ଭାଗବତ ଟୁଙ୍ଗି ନିର୍ମାଣରେ ନିମ୍ନମାନର କାମ ଅଭିଯୋଗ, ଜେଇ–ଠିକାଦାରଙ୍କ ମଧ୍ୟରେ ମିଲିଭଗତ ନେଇ ପ୍ରଶ୍ନ
କୋକସରା, ୧୨/୦୭ (କଳାହାଣ୍ଡି ଜିଲ୍ଲା କୋକସରା ରୁ ମଣ୍ଟୁ ପାଣିଗ୍ରାହୀ ଭଞୀଦୁତ ଖବର କାଗଜ) : ରାଜ୍ୟରେ ଦୁର୍ନୀତି ପ୍ରତି ଶୂନ୍ୟ ସହିଷ୍ଣୁତାର କଥା କୁହାଯାଉଥିବା ବେଳେ କଳାହାଣ୍ଡି ଜିଲ୍ଲା କୋକସରା ବ୍ଲକ ଅନ୍ତର୍ଗତ କାଉଡୋଳା ପଞ୍ଚାୟତର ବାଞ୍ଜିବାହାଲ ଗ୍ରାମରେ ଚାଲିଥିବା ଭାଗବତ ଟୁଙ୍ଗି ନିର୍ମାଣ କାର୍ଯ୍ୟକୁ ନେଇ ଗୁରୁତର ଅଭିଯୋଗ ଉଠିଛି। ନିର୍ମାଣ କାର୍ଯ୍ୟରେ ନିମ୍ନମାନର ସାମଗ୍ରୀ ବ୍ୟବହାର ସହ ଜେଇ ଓ ଠିକାଦାରଙ୍କ ମଧ୍ୟରେ ମିଲିଭଗତ ଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମବାସୀଙ୍କ କହିବା ଅନୁଯାୟୀ, ନିର୍ମାଣ କାମରେ ମାନସମ୍ମତ ସିମେଣ୍ଟ ବ୍ୟବହାର କରାଯାଇନଥିବା ବେଳେ ନିର୍ଦ୍ଧାରିତ ମାପ ଓ ମାନଦଣ୍ଡ ଅନୁସାରେ କାମ ହୋଇନାହିଁ। ଭାଗବତ ଟୁଙ୍ଗିର ଛାତ ଅସମାନ ଓ ବଙ୍କା ହୋଇଥିବା ସହ ବିଭିନ୍ନ ସ୍ଥାନରେ ଗିଟି ବାହାରକୁ ଦେଖାଯାଉଥିବାରୁ କାର୍ଯ୍ୟର ଗୁଣମାନ ନେଇ ସନ୍ଦେହ ପ୍ରକାଶ ପାଇଛି। ଅଭିଯୋଗ ଅନୁସାରେ, କାମକୁ ତ୍ୱରାନ୍ୱିତ ଭାବେ ଶେଷ କରିବା ଉପରେ ଗୁରୁତ୍ୱ ଦିଆଯାଉଥିବା ବେଳେ ଗୁଣବତ୍ତା ପ୍ରତି ଅବହେଳା କରାଯାଇଛି। ନିର୍ମାଣ କାର୍ଯ୍ୟର ନିୟମିତ ତଦାରଖ ହେଉନଥିବାରୁ ଏଭଳି ତ୍ରୁଟି ସୃଷ୍ଟି ହୋଇଥିବା ନେଇ ସ୍ଥାନୀୟ ଲୋକ ପ୍ରଶ୍ନ ଉଠାଇଛନ୍ତି। ଏହାସହ ସମ୍ପୃକ୍ତ ବିଭାଗୀୟ କର୍ତ୍ତୃପକ୍ଷଙ୍କ ଭୂମିକାକୁ ନେଇ ମଧ୍ୟ ଅସନ୍ତୋଷ ପ୍ରକାଶ ପାଇଛି। ତେବେ, ଜେଇ ଓ ଠିକାଦାରଙ୍କ ବିରୋଧରେ ଉଠିଥିବା ଅଭିଯୋଗର ସ୍ୱାଧୀନ ଭାବେ ପୁଷ୍ଟି ହୋଇନାହିଁ। ଘଟଣାର ନିରପେକ୍ଷ ତଦନ୍ତ କରି ଯଦି କୌଣସି ଅନିୟମିତତା ପ୍ରମାଣିତ ହୁଏ, ତେବେ ଦୋଷୀଙ୍କ ବିରୋଧରେ କଠୋର ଆଇନଗତ ପଦକ୍ଷେପ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି।
